Зварот Паўла Севярынца з нагоды крытыкі ўкраінскіх беларусаў - Спадару Богдану Чыжу - Сходу праваслаўных беларусаў Украіны Дарагія браты і сёстры! Найперш, прашу прабачэньня за спазьненьне з адказам (на мінулым тыдні ўдзельнічаў у Чарнобыльскіх слуханьнях у Эўрапарляманце), і Ваш ліст атрымаў толькі 22 красавіка. Затым перапрашаю, што не паінфармаваў Вас пра маючы адбыцца візыт дэлегацыі БХД ва Украіну: сапраўды, гэта мой недагляд. Нажаль, адсутнасьць сталага кантакту з Вамі зрабілася прычынай гэткае прыкрасьці. Датычна Вашых пытаньняў, зададзеных у Звароце. 1. Мы сустракаліся ў Кіеве як з кіраўніцтвам ХДС, так і з прадстаўнікамі пратэстанцкіх цэркваў. Уважаем пратэстантаў за хрысьціянаў; што ж да касмапалітызму, дык эвангелікі, зь якімі мы мелі спатканьні, размаўлялі па-украінску. Безумоўна, мы вельмі б хацелі сустрэцца і з прадстаўнікамі Праваслаўнае царквы, і з Грэка-каталікамі – спадзяемся, што з Божай і Вашай дапамогай неўзабаве гэта зробім. Гатовыя сустрэцца таксама асобна з Вамі – калі ласка, паведамце пра зручную для вас дату і месца. 2. БХД не засяроджваецца адно на перасьледзе пратэстантаў (проста фактаў уціску на эвангелічныя цэрквы ў Беларусі сапраўды колькасна больш). 3. Аргкамітэт БХД віншуе з рэлігійнымі сьвятамі як паводле праваслаўнага, так і паводле каталіцка-пратэстанцкага календара. Дарэчы, паштоўкі й падарункі для сьвятароў і вернікаў прыпадаюсь якраз на праваслаўны Вялікдзень. 4. БХД ня ёсьць выключна пратэстанцка-каталіцкім праектам. Сярод чатырох сустаршыняў Аргкамітэту два (Віталь Рымашэўскі і я) – праваслаўныя. Лік праваслаўных сярод хрысьціянскіх дэмакратаў дасягае 30%. Падаецца, большасьць непаразуменьняў паўстала праз адсутнасьць сталага кантакту паміж БХД і праваслаўнымі беларусамі Украіны. Шчыра віншую з набліжэньне сьветлага сьвята Уваскрасеньня Хрыстова – і зычу волі, веры й Божае ласкі ў справе змаганьня за Беларусь пад бел-чырвана-белым сьцягам Ісуса Хрыста! З Богам! Ваш брат – сустаршыня Аргкамітэту БХД Павал Севярынец Менск 24.IV.2008 <<<<<<